بایرن میونخ لە ترسی لیڤەرپووڵ گرێبەستی ئەستێرەیەکی نوێ دەکاتەوە

پەیام سپۆرت - بڕیار تەها
یانەی بایرن میونخی ئەڵمانی پلانی هەیە گرێبەستیکی مایکڵ ئۆلیسی فەرەنسی و هێرشبەری یانەکەی نوێ بکاتەوە.
ئۆلیس لە هاوینی 2024 لە کریستاڵ پاڵاسەوە گواسترایەوە بۆ یانە باڤارییەکە، ئەو هێرشبەرە بە خێرایی خۆی وەک یەکێک لە دیارترین بەهرەمەندەکانی ئەوروپا ناساند، لە یەکەم وەرزی خۆی بە تۆمارکردنی 20 گۆڵ و 23 ئەسیست لە 55 یاری وەرزەکەی کۆتایی پێهێنا، ئەمەش وایکرد ببێتە جێگەی سەرنجی یانەکانی پرێمیەرلیگ، بەتایبەتی لیڤەرپووڵ و چێڵسی و مانچستەر سیتی، کە بە وردی چاودێری دەکەن.

ڕۆژنامەی بێڵدی ئەڵمانی ئاشکرای دەکات، کارگێڕی بایرن بە خێرایی هەنگاو دەنێت بۆ داخستنی دەرگا بەڕووی هەر هەوڵێکدا بۆ ڕۆیشتنی یاریزانەکەی، ئەویش لە ڕێگەی گفتوگۆوە بۆ درێژکردنەوەی گرێبەستی ئێستا، کە تاکو هاوینی 2029 درێژەی هەیە، پلانیان هەیە بۆ دوو وەرزی دیکە و تا هاوینی 2031 گرێبەستی ئۆلیسی درێژ بکەنەوە لەگەڵ زیادکردنێکی بەرچاو لە مووچەی ساڵانەی کە بە نزیکەیی 12 ملیۆن یۆرۆ دەخەمڵێنرێت، جگە لە پاداشتی گەورەی دارایی.

ڕۆژنامەکە پشتڕاستی دەکاتەوە، یانەی لیڤەرپووڵی ئینگلیزی ئارەزووی خۆی بۆ گواستنەوەی مایکڵ ئۆلیسی دەربڕیوە، لە چوارچێوەی پلانێکی یانە ئینگلیزییەکە بۆ جێگرەوەی داهاتووی محەمەد سەڵاحی میسڕی، ئەمەش وایکردووە بایرن میونخ هەنگاوەکانی بۆ نوێکردنەوەی گرێبەستەکە خێراتر بکات.