04/10/2024
452 جار خوێنراوەتەوە
تەندروستیی جیهانی هۆشداری لە بڵاوبوونەوەی ڤایرۆسێكی نوێی كوشندە دەدات
پەیام
ڕێكخراوی تەندروستی جیهانی هۆشداری لە بڵاوبوونەوەی ڤایرۆسی ماربۆرگ دەدات كە ڤایرۆسێكی كوشندەیە.
لە ڕاگەیەنراوێكدا ڕێكخراوی تەندروستیی جیهانی ئاشكرای كردووە تاكو 29ی ئەیلولی ئەمساڵ 26 حاڵەتی تووشبوون بە ڤایرۆسی ماربۆرگ پشتڕاست كراوەتەوە، كە هەشتیان گیانیان لەدەست داوە و حەوتیان لە ناوچە جیاوازەكانی ڕواندا بوون.
تەندروستی جیهانی مەزەندەی كردووە مەترسی بڵاوبوونەوەی ئەم پەتایە بەڕێژەیەكی زۆر لە سەر ئاستی نیشتمانی و هەرێمایەتی بەرز ببێتەوە، و ئەگەری گواستنەوەی بۆ وڵاتانی وەك كۆماری كۆنگۆ و تەنزانیا و ئۆگەندا هەیە.
هەروەها مەترسی هەیە لەسەر ئاستی نێودەوڵەتی بڵاو ببێتەوە زانیارییان پێگەیشتووە یەكێك لە بەركەوتەكانی ڤایرۆسەكە لەو وڵاتەی كە تێیدا بڵاو بووەتەوە، گەشتی بۆ بەلجیكا كردووە و لەوێ ڕێكاری پێویست گیراوەتە بەر.
ڤایرۆسی ماربۆرگ لە جۆرێكی شەمشەمەكوێرەوە بۆ مرۆڤ گواستراوەتەوە، لە ڕێگەی بەركەوتنی شلەی جەستە و ڕوكاری بەركەوتەی كەسی تووشبوو لە نێو مرۆڤدا بڵاو دەبێتەوە، نیشانەكانیشی بریتین لە سەرئێشەی توند و ئازاری سك و خوێنبەربوونی دەم و لوت، تاكو ئێشتاش هیچ پێكوتەیەك بۆ پەتاكە نەدۆزراوەتەوە.
لە تۆڕە کۆمەڵایەتیەکان شەیری بکە