خەزعەلی: بەقاچاخبردنی نەوت لە هەرێم زیانی دوو ملیار دۆلاری ساڵانە لە عێراق دەدات

پەیام 

سەركردەیەكی شیعەی عێراق دەڵێت هەرێم بەهۆی قاچاخی نەوتەوە زیانی لە داهاتی وڵات داوە و سەردانەكەی مەسروور بارزانیش بۆ ئەمریكا نیشانی دا كە لەسەر سیاسەتی پێش 2017 بەردەوامن.

لە میانی دیدارێكی تەلەفزیۆنیدا قەیس خەزعەلی ئەمینداری گشتیی عەسائیبی ئەهلی حەق لەبارەی سەرهەڵدانەوەی كێشە لەنێوان هەرێم و بەغداد ڕایگەیاند، هەرێمی كوردستان ڕۆژانە 400 هەزار بەرمیل نەوت بە قاچاخی هەناردە دەكات كە بەشێكی زۆریان لە كێڵگە نەوتییەكانی كەركووك و نەینەواوە بەرهەم دەهێنێت كە ناوچەی جێناكۆكن و دەرەوەی دەسەڵاتی ئیدارەی هەرێمی كوردستانە.

وتیشی قاچاخی نەوت لە هەرێمەوە شتێكی نهێنی نییە، حكومەتەكانی عێراق و هەرێمی كوردستان و ئەمریكا و سعودیە و ڕێكخراوی ئۆپیكش دەزانن و ئاگادارن، كە ساڵانە زیانی دوو ملیار دۆلار بە داهاتی گشتیی عێراق دەگەیەنێت.

لەبارەی مووچە و گرفتە بەردەوامەكانییەوە خەزعەلی وتی، حكومەتی عێراق مانگانە نزیكەی 10 ترلیۆن دیناری بۆ هەرێم ناردووە، بەڵام هەرێم پابەندی هیچ یەك لە ئەركەكانی لە یاسای بودجە نەبووە و داهاتی ڕادەست نەكردووە و هیچ نیشانەیەكی ئەرێنیشی بۆ دەستپێكردنەوەی هەناردەی نەوت لە ڕێگەی سۆمۆوە نیشان نەداوە، سەڕای ئەوەی بەغداد سازشی زۆری بۆ كردن.

ناوبراو وتیشی ئێمە كوردمان خۆشەوێت و بەشێكی سەرەكیی عێراقن، بەڵام ئەوەی گرفتەكان دروست دەكات سەركردایەتیی كوردە كە پابەندی ڕێككەوتنەكان نابێت.