چین.. درۆنێك بە قەبارەی مێشێك دروستكرا و كامێرای بچووكی تێدایە

پەیام

زانكۆی نیشتمانیی تەكنەلۆجیای بەرگریی چین، بە سەركەوتوویی درۆنێكی نوێی پەرەپێداوە كە قەبارەكەی لە مێشێك زیاتر نییە و گونجاوە بۆ بەكارهێنان لە ئەركی سیخوڕی دا.

زانكۆی نیشتمانیی تەكنەلۆجیای بەرگریی چین، بە سەركەوتوویی درۆنێكی نوێی پەرەپێداوە كە قەبارەكەی هێندەی مێشێك دەبێت و كامێرای بچووكی تێدایە و وایكردووە گونجاو بێت بۆ بەكارهێنان لە ئەركی سیخوڕیكردندا.

دیزاینی درۆنە نوێیەكە لەسەر بنەمای كۆمەڵێك باڵی هاوشێوەی گەڵا دروستكراوە، كە توانای فڕینی بە بێدەنگی هەیە، هەروەها سێ قاچی باریكی هەیە كە ئەستوورییان هێندەی ئەستووریی مووە لە مرۆڤدا، كە بۆ كاتی نیشتنەوە و بەرزبوونەوەی دروستكراوە. و پشت بە عەدەسەی كامێرا و مایكرۆفۆنێكی بچووككراوەی دەبەستێت.

درۆنە نوێیەكەی چین دەتوانێت وێنە و دەنگ و سیگناڵە كارەباییەكان تۆمار بكات، ئەمەش وایكردووە كە گونجاو بێت بۆ ئۆپەراسیۆنەكانی سیخوڕی كە پێویستیان بە نهێنیی تەواو هەیە. بەجۆرێك كە ئەم فڕۆكەیە بەهۆی قەبارە بچووكەكەیەوە، بە چاوی مرۆڤ بە ئاسانی دەستنیشان ناكرێت.

ئەم داهێنانە نوێیەی حكومەتی چین كارئاسانی دەكات، كە بە ئاسانی بگەنە ئەو شوێنانەی گەیشتنیان بە فڕۆكە بێفڕۆكەوانە ئاساییەكان قورسە، وەك ناو ماڵەكان و ژوورە داخراوەكان.