مۆدریچ دوایین پەیامی گەیاند و ماڵئاوایی کرد

پەیام سپۆڕت - مەڕوان تاڵیب

لۆکا مۆدریچی کڕواتی و یاریزانی ڕیاڵ مەدرید دوایین چاوپێکەوتنی لەگەڵ تیپەکەی ئەنجامدا و ڕایگەیاند، سەردەمێکی لەبیرنەکراو کۆتایی هات.

 لۆکا قسەی بۆ ماڵپەری فەڕمی یانە شاهانەییەکە کرد و سەرەتا وتی: بیرکردنەوە لە هەموو ئەو شتانەی بەدەستم هێناوە هەمیشە دڵخۆشم دەکات، تەنانەت ئێستا دوای جێهێشتنی تیپەکەش، سەردەمێکی لەبیرنەکراو و شکۆمەند و سەرکەوتوو کۆتایی هات و مەدرید هەموو شتێکی بەمن بەخشی، هەربۆیە تاکو کۆتایی ژیانم سوپاسگوزاری ئەم یانەیە دەبم.

مۆدریچ ئەوەش دەخاتەڕوو، ئەو ئامارانەی بەدەستی هێناوە و بوون بەو یاریزانەی زۆرترین نازناوی لەگەڵ باشترین یانەی مێژوودا بەدەست هێناوە بەڕاستی سەرنجڕاکێشە و هەستی کردووە ماڵێکی دیکەی لە ئیسپانیا هەیە.

لە کۆتایدا سەبارەت بە باشترین ساتی لەگەڵ ڕیاڵ، ئەو یاریزانە کڕواتییە ئاماژەی بەوەکرد، ئەستەمە ساتێک دەستنیشان بکات، بەڵام هەمیشە دەیەمین نازناوی چامپیۆنسلیگ بە گرنگ دەزانێت، چونکە خاڵی دەستپێک بوو لە ماوەی 10 ساڵدا شەش نازناوی یانەپاڵەوانەکانیان بەدەست هێنا.