15/07/2025
233 جار خوێنراوەتەوە
فەرماندەی هێزە چەكدارەكانی عێراق: هێرش بۆسه‌ر كێڵگه نه‌وتییه‌كان تاوانه
په‌یام
فەرماندەی هێزە چەكدارەكانی عێراق راگه‌یه‌نراوێكی له‌سه‌ر هێرشكردنه سه‌ر كێڵگه نه‌وتییه‌كانی هه‌رێمی كوردستان بڵاوكرده‌وه و رایگه‌یاندووه، كات و سروشتی هێرشەكان بۆ سەر كێڵگە نەوتییەكانی هەرێم بۆ تێكەڵكردنی كارتەكانە.
سەباح نعمان، وتەبێژی فەرماندەی هێزە چەكدارەكانی عێراق راگه‌یه‌نراوێكی بڵاوكردوه‌ته‌وه و تێیدا هاتووه، دوو کێڵگەی نەوتی هەرێمی کوردستان لە لایەن فڕۆکەی بێفڕۆکەوانەوە هێرشی کرایە سەر و ئەمەش هەڕەشەیەكی راستەوخۆیه بۆ سەر بەرژەوەندییەکانی عێراق و هه‌روه‌ها دەستدرێژییە بۆسەر هەوڵەکانی دەوڵەت بۆ چەسپاندنی سەقامگیری.
وتەبێژی فەرماندەی هێزە چەكدارەكانی عێراق ده‌ڵێت، سروشت و کاتی ئەم کردەوە تاوانکاریانە ئاماژەیە بۆ نیازێكی قێزەون، کە ئامانج لێی تێكەڵكردنی كارتەكان و تێکدانی دۆخەکە و زیانگەیاندنە بە عێراق و دامەزراوە زیندووه‌كانی.
نوعمان راشیگه‌یاندووه، فەرماندەی گشتی هێزە چەکدارەکان بەڕێز محەمەد شیاع سودانی فەرمانی بە لایەنە پەیوەندیدارەکان کردووە لێکۆڵینەوەی دەستبەجێ و هەمەلایەنە دەستپێبکەن بۆ دەستنیشانکردنی ئەو کەسانەی لەپشت ئەم هێرشانەوەن و ڕێوشوێنی توندوتۆڵ بگرنەبەر بۆ لێپرسینەوە لەوانەی بەشدارن.
لە تۆڕە کۆمەڵایەتیەکان شەیری بکە