مارک بێرناڵ لە یەکەم ڕاهێنانی پێش وەرز هانسی فلیکی شۆک کردووە

پەیام سپۆڕت - مەڕوان تاڵیب

مارک بێرناڵی یاریزانی لاوی یانەی بەرشەلۆنە دوای گەڕانەوەی لە پێکان هانسی فلیکی ڕاهێنەری شۆک کردووە.

 ئەو یاریزانە لاوەی ئەکادیمای لاماسیا وەرزی رابردوو لەلایەن فلیکەوە پاڵپشتی تەواو کرا، بەڵام لە هەفتەی سێیەمی سەرەتای لالیگا دووچاری پچرانی بەستەری ئەژنۆی هات و وەرزەکە بۆی کۆتایی هات و نەگەڕایەوە.

ڕۆژنامەی موندۆ دیپۆرتیڤۆ ئاشکرای دەکات، دوای چاکبوونەوەی لەو پێکانە سەختە، بێرناڵ بەشداری مەشقە ئامادەکارییەکانی بۆ وەرزی نوێ کردووەتەوە، بەڵام ئەوەی جێگەی سەرسوڕمانی فلیک بووە توانا جەستەییە بەهێزەکەی بێرناڵ بووە سەرەڕای ئەوەی ماوەیەکی زۆر دوور کەوتووەتەوە و هەمووانی سەرسام کردووە.

لە ماوەی پێکانەکەی بێرناڵ لە هۆڵی وەرزشی تایبەتی یانەکە قۆناغەکانی چاکبوونەوەی پێکانەکەی ئەنجام داوە و ئەوەش وایکردووە توانای جەستەیی و ماسولکەکانی زۆر بەهێز ببن و ماسولکەی زیادە لە قاچ و قۆڵیدا دروست بکات و ئەمەش لە ئاستی جەستەیی خۆیدا لە یەکەم ڕاهێنانەکانیدا وەک ئامادەکاری بۆ وەرزی نوێ ڕەنگدانەوەی هەبوو.

سەرەڕای ئامادەیی جەستەیی یاریزانەکە، بەڵام تا ئێستا هیچ وادەیەکی فەرمی بۆ گەڕانەوەی بۆ یاریگاکان دیاری نەکراوە، چونکە چاوەڕێی بڕیاری کۆتایی ستافی پزیشکی و تەکنیکی تیپەکە دەکات.