هەرێمێكی ئەڵمانیا ڕۆژانی جەژنی بە پشووی مسوڵمانان دیاریی كرد

پەیام 

هەرێمێكی وڵاتی ئەڵمانیا ڕۆژانی جەژنە ئیسلامییەكانی وەك پشوو بۆ مسوڵمانان دیاریی كرد.

دوابەدوای ڕێككەوتنی حكومەتی ناوچەیی و ڕابیتەی ناوەندە كەلتوورییە ئیسلامییەكان، ڕۆژى یەكشەممە 28ى 9ى 2025، هەرێمی (شلیسیفیگ هۆڵشتاین) ئەوپەڕی باكووری ئەڵمانیا بڕیاری دیارییكردنی ڕۆژانی جەژنی ڕەمەزان و قوربانی بۆ مسوڵمانان بە پشوو دەركرد.
 
بڕیارەكە قوتابیانی قوتابخانە ئیسلامییەكان دەگرێتەوە و هەمان بنەمایە، كە بۆ شوێنكەوتووانی ئایینەكانی دیكەیش كاری پێ دەكرێت و دەتوانن لەو ڕۆژانەدا نەچنەوە سەر كار.

لەوبارەوە ڕۆژنامەی (كیلەر ناخریشتن)ی ئەڵمانی لە وەزیری فێركردنی هەرێمی (شلیسیفیگ هۆڵشتاین) گواستیەوە "مسوڵمانان بەشێكن لە كۆمەڵگەكەمان، ئەوەش بەڵێنێكە لە ڕێككەوتنەكەماندا جەختی لێ دەكەینەوە".

بەپێی زانیارییەكان، ڕێككەوتنەكە تەنیا پشووەكان ناگرێتەوە، بەڵكو ماف بە ڕابیتەی ناوەندە كەلتوورییە ئیسلامییەكان دەدات خۆی ناوەندە فێركارییەكان و كەلتوورییەكان بەڕێوە ببات و ڕاهێنان بە پێشنوێژ و وتارخوێن بكات.

هەر وەك ئەگەری ڕێككەوتنەكە لە ماوەیەكی دووردا ڕێگە لەبەردەم خوێندنی وانەی ئایینیش لە قوتابخانەكاندا بكاتەوە.

بەپێی ئامارەكانی وەزارەتی نێوخۆی ئەڵمانیا نزیكەی پێنج ملیۆن و 600 هەزار مسوڵمان لەو وڵاتە دەژین و 2600 یەكێتی و كۆمەڵەی ئیسلامییش هەن.