06/10/2025
469 جار خوێنراوەتەوە
بەهۆی بەفربارینەوە 1000 شاخەوان لەسەر چیای ئێڤرێست گیریان خواردووە
پەیام
بەهۆی گەردەلوولێكی بەفرینەوە نزیكەی هەزار گەشتیار و شاخەوان لە شاخی ئێڤرێست گیریان خواردووە.
میدیای چین بڵاوی كردەوە، لە چیای ئێڤرێست لە سنووری تبت، بەفرێكی چڕ باریوە و بەهۆیەوە نزیكەی هەزار گەشتیار و شاخەوان گیریان خواردووە.
بەپێی هەواڵی میدیاكان، لە ڕۆژی شەممەوە بەفربارینی چڕ چیای ئێڤرێستی گرتووەتەوە بەجۆرێك چڕترین بەفربارینە لە ماوەی ساڵانی ڕابردوودا و بەشێوەیەكی بەرچاو توانای بینینی كەم كردووەتەوە، بەجۆرێك شاخەوانەكان تەنیا یەك مەتر بەردەمی خۆیان دەبینن.
ڕاپۆرتەكان ئاماژەیان بەوە كردووە لە هەندێك شوێن بە تەواوی چادری شاخەوانەكان بە بەفر داپۆشراوە، بەهۆی بەفربارین و كەمیی ئاستی بینینیەوە گەشتیاران ناتوانن لە شاخەكە داببەزین، هەوڵەكانی ڕزگاركردنیش بە سستی بەڕێوە دەچن.
زنجیرە چیای ئێڤرێست بەرزترین شاخە لەسەر زەوی و نزیكەی 9 كیلۆمەتر لەسەر ئاستی ڕووی دەریاوە بەرزە و دەكەوێتە سەر سنوورەكانی چین و نیپاڵ و هینستان و ساڵانە دەیان هەزار گەشتیار و شاخەوان هەوڵی سەركەوتن بەسەر چیاكەدا دەدەن.
لە تۆڕە کۆمەڵایەتیەکان شەیری بکە