بەهۆی دەستدرێژی بۆ سەر كچان، شای بەریتانیا براكەی خۆى لە ژیانی شاهانە دوورخستەوە

پەیام 

بەهۆی دەستدرێژی بۆ سەر كچان و ژنان، شای بەریتانیا سەرجەم نازناو و خەڵات و هێماكانی لە براكەی سەندەوە و لە ژیانی شاهانە دووری خستەوە.

لە هەنگاوێكدا كە بە تووندترین لە نێو بنەماڵەی پاشایەتی لە دەیانساڵی ڕابردوو دادەنرێت، شار چاڕڵز، شای بەریتانیا دەستی بە لێسەندنەوەی سەرجەم خەڵات و نازناو و پۆستە تەشریفاتییەكان لە ئەمیر ئەندرۆی برا بچووكەكەی كرد.

لە ڕاگەیەنراوێكدا، كۆشكی باكنگهام ئاشكرای كرد شا چاڕڵز خۆی بەتایبەت فەرمانی كردووە بەوەی سەرجەم پێدراوە شاهانەییەكان لە ئەندرۆ بسەننەوە و لەمەودوا پێویستە تەنیا بە ناوی "ئەندرۆ ماونتباتن" بانگ بكرێت و نازناوی شازادەی بۆ بەكار نەهێنرێت و ئەو خانووەش چۆڵ بكات كە ئێستا تیایدا دەمێنێتەوە.

تا ئێستاش ئەندرۆ سەرجەم ئەو تۆمەتانەی لەبارەی دەستدرێژی بۆ سەر ژنان و كچانی پێنەگەیشتوو ئاڕاستەی كراون ڕەت دەكاتەوە، بەڵام لە فەرمانە شاهانەكەدا هاتووە: وەك هاوخەمی لەگەڵ قوربانیانی قۆستنەوە و دەستدرێژیی، سزای ئەو ئەندامەی خێزانی شاهانە دراوە.

ئەم ڕێكارە دوای ئەوە دێت، هەفتەی ڕابردوو یەكێك لەوانەی لە هەرزەكارییدا لەلایەن ئەندرۆوە دەستدرێژیی كراوەتە سەر كتێبێكی بڵاو كردەوە و باسی لەو تۆڕەی بازرگانیی جنسی و دەستدرێژی دەكات كە لەلایەن جیفری ئیبستین، ملیاردێری كۆچكردووی ئەمریكییەوە سەرپەرشتیی دەكرا و كچان و ژنانی بۆ سەرۆك و سەركردە و كوڕە دەوڵەمەند و خێزانی شاهانەی وڵاتان دەبرد و ئاهەنگی بەدڕەوشتی و دەستدرێژیی ڕێك دەخست.