1 کاتژمێر پێش ئێستا
44 جار خوێنراوەتەوە
ئەمریكا.. تا كاتێكی نادیار بڕیاری پێدانی مافی پەنابەریی ڕاگیرا
پەیام
لە كاردانەوەی تەقەكردن لە سەربازانی ئەمریكا لە نزیك كۆشكی
سپی، بە فەرمی ئەمریكا بڕیاری دا تا كاتێكی نادیار سەرجەم بڕیارەكانی بەخشینی مافی
پەنابەری ڕابگرێت.
لەسەر ئەم دۆسیەیە جۆزێف ئیدلۆ بەڕێوەبەری فەرمانگەی كۆچ
و ڕەگەزنامەی ئەمریكی بڵاوی كردەوە، "فەرمانگەكە بڕیاریداوە سەرجەم بڕیارەكانی
تایبەت بە پەنابەری ڕابگرێت، تا بەدەستهێنانی گرەنتی لە بارەی وردەكاری و پشكینی تەواو،
دەشڵێت: سەلامەتی گەلی ئەمریكا لە پلەی یەكم دێت.
هاوكات ماركۆ ڕۆبیۆ وەزیری دەرەوەی ئەمریكا هەڵپەساردنی
پێدانی ڤیزای بە هەڵگرانی پاسپۆرتی ئەفغانی ڕاگەیاند.
ئەم ڕێكارە توندانە وەك پەرچەكردارێك دێن دوای ڕووداوێكی
تەقەكردن لە نزیك كۆشكی سپی كە بووە هۆی دروستبوونی شۆكێكی ئەمنی، هاوكات دۆناڵد
ترەمپ ڕایگەیاند كە بەنیازە كۆچكردن لە "وڵاتانی جیهانی سێیەم" ڕابگرێت
و هەڕەشەی هەڵوەشاندنەوەی ملیۆنان دۆسیەی پەنابەری كرد كە لە سەردەمی ئیدارەی پێشوودا
پەسەند كراون.
هۆكاری سەرەكی ئەم بڕیارانە دەگەڕێتەوە بۆ هێرشەكەی ڕۆژی
چوارشەممە لە نزیك وێستگەی میترۆی فاراگوت وێست، كە تیایدا هاووڵاتییەكی ئەفغانی بەناوی
(رەحمانوڵڵا لاكنوال) تەقەی لە دوو ئەندامی پاسەوانی نیشتمانی كرو دوو هاووڵاتی گیانیان
لەدەستدا،
تۆمەتبارەكە پێشتر لە ساڵی 2011ەوە كاری بۆ هێزەكانی ئەمریكا
و دەزگای هەواڵگری سی ئای ئەی كردووە و لە نیسانی 2025 مافی مانەوەی وەرگرتووە.
لە تۆڕە کۆمەڵایەتیەکان شەیری بکە