عێراق: سنوورەكانمان لەگەڵ سووریا بە تەواوی پارێزراون

پەیام 

شانەی راگەیاندنی ئەمنیی عێراق دەڵێت، سنورەكانی عێراق بەتەواوی پارێزراون و بە رێوشوێنی مەیدانی و تەكنیكی بەڕێوەدەبرێن.

سەعد مەعن، سەرۆكی شانەی راگەیاندنی ئەمنی لە فەرماندەیی ئۆپەراسیۆنە هاوبەشەكان، لە بەیاننامەیەكدا رایگەیاندووە، سنورەكانی عێراق بە تەواوی پارێزراون و لەژێر كۆنترۆڵی توندی هێزە ئەمنییە تایبەتمەندەكاندان.

ئاماژەی بەوەشكرد، فەرماندەیی پاسەوانی سنور بەپێی ئەو ئەركانەی پێیان سپێردراوە، بەردەوامە لە ئەنجامدانی ئەركە ئەمنییەكانی خۆی لەسەر بنەمای پلانی دیراسە بۆكراو كە پشت بە سیستەمی چاودێری پێشكەوتوو و ڕێكارە تەكنیكییە ئاڵۆزەكان و قایمكاری توندوتۆڵی  مەیدانییە بەهێز دەبەستێت، بەجۆرێك بەرزترین ئاستی ئاسایش و سەقامگیری بەدرێژایی تەواوی پشتێنەی سنوورەكە مسۆگەر دەكات.

رونیشیكردەوە، بە پاڵپشتی لە ناوخۆی عێراق و بەدرێژایی تەواوی سنورەكان، هێڵی بەرگری یەك لە دوای یەك و بەهێزكراو هەن، كە لەلایەن یەكە ئەمنییە جیاوازەكانی عێراقەوە لە سەرجەم لق و پسپۆڕییە پێویستەكانەوە سەرپەرشتی دەكرێن، ئەمەش توانای هێزە ئەمنییەكان بەرز دەكاتەوە بۆ مامەڵەكردن لەگەڵ هەر حاڵەتێكی لەناكاو.

جەختیشكرد، ئەم بڵاوەپێكردنە رێكخراوە ڕەنگدانەوەی ئاستی بەرزی ئامادەیی و هەماهەنگی بەردەوامی نێوان هێزە ئەمنییە جیاوازەكانە كە ئەركی پاراستنی سنورەكانی وڵاتیان پێسپێردراوە، ئەوەش هاوكاتە لەگەڵ وەرگرتنەوەی تەواوی بنكەی عەین ئەسەد لەلایەن سوپای عێراقەوە، لە هەنگاوێكدا كە سەپاندنی سەروەری نیشتمانی و بەهێزكردنی تواناكانی هێزە چەكدارەكان لە بەڕێوەبردنی دۆسییە ئەمنییەكان بە ئاستێكی باڵای لهێاتوویی پشتڕاست دەكاتەوە.