بەفر سیتەک سپی پۆش دەکات و تیمەکانی هاتووچۆ لە ئەرکدان بۆ کرانەوەی ڕێگاکان

په‌یام
لە ئێستادا شەپۆلێکی بەفربارینی زۆر ناوچەی سیتەکی گرتووەتەوە و پێشبینی دەکرێت بە تێپەڕبوونی کات ڕێژەی بەفربارینەکە زیاد بکات، بەو هۆیەشەوە مەترسی بەستنی ڕێگاکان لە درەنگانێکی شەودا هەیە.
بۆ ڕێگریگرتن لە گرتنی ڕێگاکان، بە سەرپەرشتی قائیمقامی قەزای شارباژێڕ و بە هاوکاری تیمەکانی ئاوەدانکردنەوە، بەڕێوەبەرایەتی هاتووچۆی شارباژێڕ و سریەی پێشمەرگەی تونێلی سکرتاریەت، دەستکراوە بە پاککردنەوەی ڕێگاکان و لێدانی کاسیحە. هاوکات تیمەکان لە هەوڵدان بۆ ڕشتنی خوێ بە مەبەستی ڕێگریکردن لە بەستنی ڕێگاکان و ئاسانکاری بۆ هاتوچۆی هاووڵاتییان.
لای خۆشیانەوە لایەنە پەیوەندیدارەکان ئاگادارییەک ئاڕاستەی شۆفێران دەکەن کە زۆر بە وریاییەوە شۆفێری بکەن و تەنها بۆ حاڵەتی زۆر پێویست ڕێگاکە بەکارنەهێنن، ئەمەش لەپێناو پاراستنی سەلامەتی گیانی گشتی.