23/01/2026
222 جار خوێنراوەتەوە
ئەمریكا بە فەرمی لە ڕێكخراوی تەندروستیی جیهانی كشایەوە
پەیام
ویلایەتە یەكگرتووەكانی ئەمریكا بە فەرمی لە ڕێكخراوی تەندروستیی جیهانی كشایەوە.
دوای ئەوەی لە یەكەم ڕۆژی سەرۆكایەتییەكەیدا لە ساڵی 2025، دۆناڵد ترەمپ فەرمانێكی جێبەجێكاریی واژوو كرد و تیایدا كشانەوەی وڵاتەكەیی لە ڕێكخراوی تەندروستیی جیهانی كرد، دوێنێ شەو ئەمریكا بە تەواوی لە ڕێكخراوەكە كشایەوە و ئاڵای ئەمریكا لەبەردەم بارەگای ڕێكخراوەكە هێنرایە خوارەوە.
ئەمەش لەكاتێكدایە شارەزایان و سیاسییەكانی ئەمریكا و جیهان هۆشدارییان داوە لەوەی هەنگاوەكەی كۆشكی سپی كاریگەریی نەرێنی لەسەر كەرتی تەندروستیی ئەمریكا و جیهانیش دەبێت. بەڵام بەرپرسانی واشنتۆن ئاماژەیان بەوە دا بڕیارەكە بەهۆی كەمتەرخەمیی ئەو ڕێكخراوەی سەر بە نەتەوەیەكگرتووەكانە لە بەڕێوەبردنی قەیرانی پەتای كۆرۆنا و ڤایرۆسی كۆڤید 19.
هەریەك لە وەزارەتەكانی تەندروستیی و دەرەوەی ئەمریكا ڕایانگەیاندووە، ئەمریكا لە چوارچێوەیەكی سنوورداردا مامەڵە لەگەڵ ڕێكخراوەكەدا دەكات بۆ ئەوەی كردەی كشانەوەكە تەواو بكرێت.
بەرپرسێكی باڵای حكومیش ڕایگەیاندووە: هیچ پلانێكمان نییە تەنانەت وەك چاودێریش لە ڕێكخراوەكە بمێنینەوە و دووبارەش ناچینەوە ناوی.
لە هەفتەكانی ڕابردوودا ئەمریكا لە چەند ڕێكخراوێكی دیكەی سەر بە نەتەوەیەكگرتووەكان كشاوەتەوە، ئاماژەكانیش بۆ ئەوە دەچن ترەمپ دەیەوێت ئەو ئەنجوومەنی ئاشتییەی دروستی دەكات جێی یو ئێنی پێ بگرێتەوە.
لە تۆڕە کۆمەڵایەتیەکان شەیری بکە