لە کۆبوونەوەى ئەنجوومەنی ئاسایش جەخت لە پاراستنی مافی كورد لە سووریا کرایەوە

پەیام  

ئەنجومەنی ئاسایشی نێودەوڵەتی لەسەر دۆخی سووریا و بەدیاریكراوی لەسەر ڕۆژاوای كوردستان كۆبووەوە. 

ئەنجوومەنی ئاسایشی نێودەوڵەتی كۆبوونەوەیەكی تایبەتی لەسەر دۆخی سووریا ئەنجامدا و تێیدا وڵاتانی زلهێز جەختیان لە پاراستنی مافەكانی كورد و مەترسیی سەرهەڵدانەوەی داعش كردەوە.

لە كۆبوونەوەكەدا، نوێنەری ڕووسیا داوای ڕێزگرتنی لە كورد و پێكهاتەكان كرد و هۆشداری دا لە مەترسی هەڵاتنی داعش لە زیندانەكان وەك هەڕەشەیەك بۆ ناوچەكە. 

هاوكات ئەمریكا پشتیوانی تەواوی خۆی بۆ ڕێككەوتنی نێوان مەزڵووم عەبدی و ئەحمەد شەڕع دەربڕی، بەتایبەت ئەو مەرسوومەی دان بە مافی زمان و كولتووری كورددا دەنێت، هەروەها جەختی لە گرنگیی تێكەڵكردنەوەی "هەسەدە" بە شێوەیەكی شكۆمەندانە بۆ ناو سوپای سووریا كردەوە.

لای خۆیانەوە بەریتانیا و فەرەنسا نیگەرانییان لە دۆخی سەختی مرۆیی و ئاوارەبوونی ژن و منداڵان لە زستاندا نیشاندا و پێشوازییان لە ئاگربەست كرد.

هاوكات هەریەك لە چین و پەنەماش وێڕای جەختكردنەوە لە سەروەریی سووریا، داوایان كرد كورد نوێنەرایەتی ڕاستەقینەی لە حكومەتی نوێدا هەبێت و كۆمەڵگەی نێودەوڵەتی بەپەلە هاوكارییەكان بگەیەنن.