لیستی كۆتایی كاندیدانی پۆستی سەرۆككۆمارى عێراق کە 19 كەسن ڕاگەیەندرا

پەیام  

ئەنجومەنی نوێنەرانی عێراق لیستی كۆتایی كاندیدانی پۆستی سەرۆك كۆماری ڕاگەیاند، كە 19 كەسن و چواریان دوای تانەگرتن لەلایەن دادگای فیدراڵییەوە ناویان بۆ لیستەكە گەڕێنراوەتەوە.

سەرۆكایەتی ئەنجومەنی نوێنەرانی عێراق دوێنێ لیستی كۆتایی ئەو كاندیدانەی بڵاو كردەوە كە مەرجە یاساییەكانیان بۆ وەرگرتنی پۆستی سەرۆككۆماری عێراق، تێدایە.

بەپێی ڕاگەیەنراوەكە، دادگای فیدراڵی تانەی چوار كاندیدی قبوڵ كردووە، كە پێشتر ناویان لە لیستی سەرەتاییدا نەبوو، ئەوانیش بریتین لە (خالید سدیق، ئازاد مەجید ، ڕافیع عەبدوڵا و سالم حەواس)، بەمەش ژمارەی كۆتایی كاندیدەكان لە 15ەوە گەیشتە 19 كەس.

جگە لەو چوار ناوەی كە گەڕێنراونەتەوە بۆ ڕكابەرییەكە لیستەكە 15 ناوی دیكە لە خۆ دەگرێت كە پێشتر بڵاو كرابوونەوە.

لە نێو لیستەكەدا هەر یەك لە سەرۆككۆماری ئێستا، نزار ئامێدی وەك پاڵێوراوی یەكێتی و فوئاد حسێن وەزیری دەرەوە وەك پاڵێوراوی پارتی هەن.

ئەمەو بەپێی ماوە دەستورییەكان پێویستە لە كۆتایی ئەم مانگەدا پۆستی سەرۆككۆماری عێراق لەلایەن ئەنجوومەنی نوێنەرانەوە یەكلا بكرێتەوە كە وەك نەریتێكی سیاسی لە دوای 2003ـەوە پۆستەكە لەلایەن كوردەوە بەڕێوە دەبرێت.