ئیلهام ئەحمەد: كەناڵی پەیوەندییمان لەگەڵ دیمەشق هەیە و دەكرێت كێشەكان چارەسەر بكەین

پەیام

بەرپرسێكی باڵای بەڕێوەبەرایەتی خۆسەر جەختی كردەوە، ئەوان جددین بۆ گەیشتن بە ڕێككەوتن و ڕایشیگەیاند: كەناڵی پەیوەندییمان بۆ گفتوگۆی درێژكردنەوەی ئاگربەست لەگەڵ دیمەشق هەیە.

ئیلهام ئەحمەد، بەرپرسی پەیوەندییەكانی دەرەوەی بەڕێوەبەرایەتی خۆسەر لە لێدوانێكدا بۆ كەناڵی (جەزیرە)ی قەتەری ڕایگەیاند: ئێمە "جددین" لە گفتوگۆكردن لەسەر وردەكاریی جێبەجێكردنی ڕێككەوتن لەگەڵ دیمەشق و پێمان وایە دەكرێت كێشە هەڵپەسێردراوەكان لە ڕێگەی ئەو كەناڵانەی پەیوەندییەوە چارەسەر بكرێن. 

ناوبراو ئاماژەی بەوەش كرد "هەوڵێكی ئەمریكی بۆ كەمكردنەوەی گرژییەكان و درێژكردنەوەی ئاگربەست لە ئارادایە، وتیشی: پڕۆسەی گواستنەوەی چەكدارانی ڕێكخراوی داعش بۆ عێراق پێویستی بەوە هەیە وادەی ئاگربەستەكە درێژ بكرێتەوە.

سەبارەت بە ئەگەری سەرهەڵدانەوەی پێكدادانەكان، ئیلهام ئەحمەد جەختی كردەوە، كە ئەوان نایانەوێت شەڕ هەڵبگیرسێننەوە، بەتایبەت كە دەبێتە هۆی ئاوارەبوونی ژمارەیەكی زۆر لە دانیشتووانی ناوچەكە، بەڵام هۆشدارییشی دا كە "ئەگەر حكومەت سوور بێت لەسەر شەڕ، ئێمەش بەرگری لە گەلەكەمان و ناوچەكە دەكەین".