تڕەمپ: هێزەکانى ئەمریکا لەنزیک ئێران دەمێننەوە

پەیام

دۆناڵد ترەمپ، سەرۆکی ئەمریکا هۆشداریی توند دەداتە ئێران و ڕایدەگەیەنێت، ئەگەر تاران پابەندی ڕێککەوتن نەبێت، هێزەکانیان ئامادەن بۆ وەشاندنی گورزێکی سەربازیی گەورەتر و بەهێزتر، کە پێشتر هاوشێوەی نەبووبێت. 

لە چوارچێوەی پەرەسەندنی گرژییەکانی نێوان واشنتن و تاران، دۆناڵد ترەمپ جەختی کردەوە کە هێزەکانی وڵاتەکەی، لەوانە کەشتییە جەنگییەکان، فڕۆکە و یەکە سەربازییەکان، لە پێگەکانی خۆیان لە دەوروبەری ئێران دەمێننەوە و لە ئامادەباشی تەواودان بۆ هەر ئەگەرێکی نەخوازراو. 

سەرۆکی ئەمریکا هەڕەشەی ئەوەی کرد کە ئەگەر ئێران بە شێوەیەکی تەواوەتی پابەندی ڕێککەوتنەکان نەبێت -کە ئەو بە دووری دەزانێت- ئەوا هێرشی سەربازی بە شێوازێکی زۆر گەورەتر و بەهێزتر لە جاران دەستپێدەکات، ئەمەش وەک ئاماژەیەک بۆ بەکارهێنانی هێزی وێرانکەر دژی ئامانجە ئێرانییەکان. 

ترەمپ ئاماژەی بەوەش کرد کە خاڵە بنەڕەتییەکانی ڕێککەوتنەکە کە ماوەیەکی زۆرە لەسەری ڕێککەوتوون، بریتین لە ڕێگریکردن لە تاران بۆ بەدەستهێنانی چەکی ئەتۆمی و دەستەبەرکردنی ئاسایشی گەرووی هورمز بۆ هاتوچۆی نێودەوڵەتی؛ هەربۆیە هێزە سەربازییەکانی ئەمریکا ئێستا سەرقاڵی خۆ کۆکردنەوەن.