1 کاتژمێر پێش ئێستا
145 جار خوێنراوەتەوە
فایننشاڵ تایمز: ئەمریكا و ئێران لە ڕێككەوتنی درێژكردنەوەی ئاگربەست نزیكن
پەیام
پاكستان بەرەوپێشچوونی لە دۆسیەی نێوەندگیریی وڵاتەكەی لەنێوان ئەمریكا و ئێران ڕاگەیاند و ڕۆژنامەیەكی ئەمریكییش دەنووسێت: درێژكردنەوەی ڕێككەوتنی كاتیی ئاگربەست نزیكە.
لە ڕاگەیەنراوێكدا، سوپای پاكستان ئاشكرای كرد كە گفتوگۆكانی عاسم مونیر فەرماندەی سوپا لەگەڵ بەرپرسانی ئێران بەرەوپێشچوونێكی دڵخۆشكەرانەی بۆ گەیشتن بە لێكتێگەیشتنی كۆتایی لێ كەوتووەتەوە.
سوپای پاكستان ڕایشیگەیاند: لە ئێستادا گفتوگۆكان جەخت لە خێراكردنی هەوڵەكان بۆ گەیشتن بە ڕێككەوتنی كۆتایی دەكەنەوە.
بە پێی ڕاگەیەنراوەكەی سوپای پاكستان "هەر چەندە سەردانەكەی مونیر بۆ ئێران كورتخایەن بووە، بەڵام بەرهەمداریش بووە".
لە لایەكی دیكەوە، ڕۆژنامەی فایننشاڵ تایمزی ئەمریكی بڵاوی كردەوە ئەمریكا و ئێران لە ڕێككەوتنێك بۆ درێژكردنەوەی ئاگربەست بۆ ماوەی 60 ڕۆژ نزیكن.
فایننشاڵ تایمز نووسیویشیەتی: ڕێككەوتنەكە بە ئاڕاستەیەكی دروستدا دەڕوات و ئێستا لە لایەنی ئەمریكییەوە گفتوگۆ لەسەر دەكرێت.
بەپێی ئەوەی ڕۆژنامەی فایننشاڵ تایمز بڵاوی كردووەتەوە "ڕێككەوتنەكە كردنەوەی قۆناغبەندیی گەرووی هورمز و گفتوگۆی سووككردن، یان ڕادەستكردنی یۆرانیۆمی پیتێنراوی ئاستبەرز لەخۆ دەگرێت".
لە بەرانبەردا، ئەمریكا گەمارۆی سەر بەندەرەكانی ئێران و گەمارۆ بنەڕەتییەكانیش سووك دەكات. جگە لەوەش هەر بەپێی ڕێككەوتنەكە ئەمریكا پارە بلۆككراوەكانی ئێران لە دەرەوە ئازاد دەكات.
لە تۆڕە کۆمەڵایەتیەکان شەیری بکە