ئیسرائیل چه‌ندین پێگه‌ی له‌ناو خاكی ئێراندا بۆردومان كرد

سوپای ئیسرائیل ڕایگەیاند فڕۆکە جەنگییەکانیان چەندین ئامانجی سەربازی و کۆمەڵگەی پێترۆکیمیایی ماهشەهریان لە باشووری ڕۆژاوای ئێران بۆردومان کردووە، ئەمەش دوای هێرشە مووشەکییەکەی تاران بۆ سەر ئیسرائیل دێت. 
ئەم هێرشانە کە بە وتەی سوپای ئیسرائیل بە ڕێنوێنی دەزگای هەواڵگریی سەربازی و بۆ سەر بنکە سەربازییەکانی دەسەڵاتی ئێران لە ڕۆژاوا و ناوەڕاستی ئەو وڵاتە ئەنجام دراون، هاوکات بوون لەگەڵ بیستنی دەنگی چەندین تەقینەوەی بەهێز لە شارەکانی تاران، تەبرێز، ئەسفەهان و دەوروبەری شاری کەرەج کە لە لایەن میدیا فەرمییەکانی ئێرانەوە پشتڕاست کرانەوە. 
ئەم پەرەسەندنە سەربازییە لە کاتێکدایە کە پێشتر میدیاکانی ئیسرائیل ئاشکرایان کردبوو، بنیامین نەتانیاهۆ سەرۆکوەزیرانی ئیسرائیل لەژێر گوشاری دۆناڵد ترەمپ سەرۆکی ئەمریکادا بووە بۆ دواخستنی وەڵامدانەوەی سەربازی، تاوەکو چانس بدرێتە بەردەوامیی دانوستانەکان بۆ گەیشتن بە ڕێککەوتنێک لەگەڵ تاراندا.