گەرچى دەستپێكردنی گفتوگۆكانی سویسرا نادیارە بەڵام ئاماژەی جموجوڵ هەیە

پەیام

هەر چەندە هیچ كاتێكی نوێ بۆ دەستپێكردنی گفتوگۆكانی سویسرا تایبەت بە گەیشتن بە ڕێككەوتنی كۆتایی لەنێوان ئێران و ئەمریكا دیاریی نەكراوە، بەڵام ئاماژەی جموجوڵ بە ئاڕاستەی ئەنجامدانی هەیە.

ماڵپەڕی ئەكسیۆسی ئەمریكی لە زاری بەرپرسێك لە كۆشكی سپییەوە بڵاوی كردەوە: ستیڤ ویتكۆف ڕاوێژكار و نێردەی تایبەتی دۆناڵد ترەمپ بە مەبەستی دەستپێكردنی گفتوگۆكان لەگەڵ ئێران بەرەو سویسرا بەڕێ كەوتووە.

بەپێی ماڵپەڕە ئەمریكییەكە "جارید كۆشنەر زاوا و ڕاوێژكاری ترەمپ بە هەمان شێوە و بۆ هەمان مەبەست لە سویسرایە و پێشبینی دەكرێت گەڕی یەكەمی گفتوگۆكان بەڕێوە بچێت".

سەبارەت بە لایەنی ئێرانیش، ئەكسیۆس بڵاوی كردەوە "عەباس عەراقچی وەزیری دەرەوە پلانی گەشتكردن بۆ سویسرای بۆ هەمان مەبەست هەیە، بەڵام هێشتا پلانەكە بواری گۆڕانی تێدا هەیە".

هەر چەندە بڕیار بوو دوێنێ، هەینی بە مەبەستی واژووكردنی ڕووبەڕووی یاداشتی لێكتێگەیشتنەكەی نێوانیان و دەستكردن بە گفتوگۆ بۆ گەیشتن بە ڕێككەوتنی كۆتایی هەر دوو لایەنی ئێرانی و ئەمریكی لە سویسرا كۆ ببنەوە، بەڵام كۆبوونەوەكە بۆ كاتێكی نادیار دوا خرا و جێگری سەرۆكی ئەمریكاش كە سەرۆكی شاندەكەی گەشتەكەی بۆ ئەو وڵاتە ئەنجام نەدا.

سەبارەت بە هۆكاری ئەنجامنەدانی كۆبوونەوەكەش هێشتا هیچ هۆكارێكی دیارییكراو ڕانەگەیەنراوە.