دوای هەشت ڕۆژ لەژێر داروپەردوودا پیاوێك لە بوومەلەرزەكەی ڤەنزوێلا ڕزگار كرا

پەیام 

تیمەكانی فریاگوزاری توانییان پیاوێك بە زیندوویی لەژێر داروپەردووی باڵەخانەیەك لە ڤەنزوێلا ڕزگار بكەن، ئەمەش دوای هەشت ڕۆژ لەو بوومەلەرزە وێرانكەرەی كە لە 24ی حوزەیراندا ئەو وڵاتەی هەژاند و هەزاران قوربانی لێكەوتەوە.

بەپێی میدیا بیانییەكان، هێرنان خیل لە كاتی ڕوودانی بوومەلەرزەكەدا لە ژووری پاسەوانی باڵەخانەی كارەكەی بووە لە ناوچەی كاتیا لا مار لە ویلایەتی لا گوایرا.

هاوسەرەكەی، گۆسپیمار گۆنزالیس، ڕزگاركردنی هاوسەرەكەی بە "موعجیزە" ناوبرد و سوپاسی هەماهەنگی تیمە نێودەوڵەتییەكانی كرد.

لەم پڕۆسە ئاڵۆزەدا كە مەترسی داڕمانی زیاتری لەسەر بوو، تیمەكانی حەوت وڵات بەشداربوون كە پێكهاتبوون لە: ڤەنزوێلا، چیلی، ئەمریكا، پورتوگال، كۆستاریكا، ئێلسالڤادۆر و مەكسیك.

لەلایەكی دیكەوە، ئامارە فەرمییەكان ئاماژە بە كارەساتێكی مرۆیی گەورە دەكەن، بە جۆرێك ژمارەی گیان لەدەستدان گەیشتووەتە دوو هەزار و 295 كەس و زیاتر لە 11 هەزار كەسیش بریندارن.

ئێستا دەیان هەزار كەس لە ڕیزبەندی بێسەروشوێنەكاندان و نزیكەی 13 هەزار كەسیش بێ ماڵ و حاڵ ماونەتەوە.

هەرچەندە ڕزگاركردنی ئەم پیاوە هیوایەكی نوێی بەخشی، بەڵام بەهۆی تێپەڕبوونی كاتێكی زۆر، هیوای دۆزینەوەی كەسانی دیكە بە زیندوویی لەژێر داروپەردەكاندا بەرەو نەمان دەچێت.