ئیدارەى دەوڵەت: دژى بەکارهێنانى خاکی عێراقین بۆ هێرشکردنى سەر وڵاتانی هاوسێ

هاوپەیمانیی ئیدارەی دەوڵەت لە عێراق ڕایگەیاند بەکارهێنانی خاکی وڵاتەکەیان بۆ هێرشکردنە سەر وڵاتانی دراوسێ قەدەغەیە و جەختی کردەوە لە سەپاندنی سەروەریی یاسا. 
لەکۆبوونەوەی ئاسایی خۆیدا، هاوپەیمانیی ئیدارەی دەوڵەت پێداگیریی لەسەر پاراستنی ئاسایشی سنوورەکان و ڕێگریکردن لە هەر هەوڵێک کردەوە کە خاکی عێراق بکاتە بنکەیەک بۆ پەلاماردانی وڵاتانی دراوسێ. هاوکات جەختیشی کردەوە کە ھەر لایەن یان گروپێک  مەترسی لەسەر ئاسایشی نیشتمانی دروست بکات، بە دەرچوو لە یاسا ئەژمار دەکرێت و دەبێت ڕووبەڕووی یاسا بکرێتەوە. 
هاوپەیمانییەکە سەرکۆنەی ئەو هێرش و دەستدرێژییانەی کرد کە دەکرێنە سەر بەش و یەکە جیاوازەکانی هێزە چەکدارەکانی عێراق. لە هەمان کاتدا پشتیوانی تەواوی خۆی بۆ کورتکردنەوەی چەک لە دەستی دەوڵەتدا دەربڕی، بەپێی ئەو بەرنامە وزارییەی کە پێشتر لەلایەن ئەنجومەنی نوێنەرانەوە پەسەند کرابوو. 
لە کۆتاییدا، هاوپەیمانیی ئیدارەی دەوڵەت داوای کرد سەرجەم لایەنەکان پابەندی ئەو خشتە زەمەنییە بن کە بۆ پرۆسەی کۆکردنەوە و کورتکردنەوەی چەک دیاری کراوە، کە دوا مۆڵەتی تا کارپێکردنی دوای ٣٠ی ئەیلوولی ٢٠٢٦ دیاری کراوە.