هادی عامری: كۆكردنەوەی چەك لە دەستی حكومەت بنەمایە بۆ دەوڵەتێكی بەهێز

پەیام

ئەمینداری گشتیی ڕێكخراوی بەدر ڕێكخستنی چەكی وەك ئامانجێكی دەستووریی نیشتمانی و بڕیارێكی سەربەخۆی عێراقی وەسف كرد و ڕایشیگەیاند: بە هیچ شێوەیەك پێكدادان لەنێوان حكومەت و هێزەكانی مقاوەمە ڕوو نادات. 

هادی عامری ئەمینداری گشتیی ڕێكخراوی بەدری عێراقی لە وتارێكیدا لە مەڕاسیمی ساڵیادی محەممەد باقر حەكیم لە بەغداد، ئاماژەی بەوە كرد كە كۆكردنەوەی چەك لە دەستی حكومەت بنەمایەكە بۆ بونیادنانی دەوڵەتێكی بەهێز كە توانای پاراستنی ئاسایش، سەروەری و كەرامەتی عێراقی هەبێت.

هادی عامری وتیشی: ئەم هەنگاوە بڕیارێكی تەواو عێراقییە، نەك دەرەكی و بە هەموو شێوەیەك هەر جۆرە دەستێوەردانێكی بیانی لەم دۆسیەیەدا ڕەت دەكەینەوە.

ئەو وتیشی: گرەنتی دەكەم بە هیچ جۆرێك ڕووبەڕووبوونەوە لە نێوان حكومەت و گرووپە چەكدارەكاندا ڕوو نادات.

لەبارەی بەرەنگاربوونەوەی گەندەڵیشەوە، ئەمینداری گشتیی ڕێكخراوی بەدر ڕایگەیاند: دۆسیەی بەرەنگاربوونەوەی گەندەڵی بڕیارێكی پەسەندكراوی نێو چوارچێوەی هەماهەنگییە و لەو پێناوەشدا پشتیوانیی تەواو لە هەنگاوەكانی سەرۆكوەزیران دەكەین.