ئافاد: بومه‌له‌رزه‌كه‌ی ئه‌م به‌یانییه‌ بێ زیان بووه‌

په‌یام

ڕۆژی پێنجشەممە بومەلەرزەیەک بە گوڕی ٥.٦ پلە باشووری ڕۆژهەڵاتی تورکیا و باکوور و ڕۆژهەڵاتی سووریای هەژاند، بەبێ ئەوەی تا ئێستا هیچ زیانێکی گیانی و ماددی لێ بکەوێتەوە. 
بەپێی زانیارییەکانی دەستەی بەڕێوەبردنی کارەسات و باری لەناکاوی تورکیا (ئافاد)، بومەلەرزەکە کاتژمێر ١٠:٤٠ی خولەکی بەیانی بە کاتی ناوخۆ ڕوویداوە و چەقەکەی لە باکووری شاری شانلی ئورفا بووە. دەستەکە ئاماژەی بەوەش کردووە کە تا ئێستا هیچ ڕاپۆرتێک لەبارەی لێکەوتەی بومەلەرزەکەوە نەگەیشتووە. 
لەلای خۆیەوە حەسەن شلداک، پارێزگاری شانلی ئورفا، بۆ کەناڵی "ئێن تی ڤی" ـی تایبەت ڕایگەیاند دانیشتووانی شارەکە بە توندی هەستیان بە بومەلەرزەکە کردووە. ناوبراو وتی: "بەپێی زانیارییە سەرەتاییەکان، هیچ حاڵەتێکی گیانلەدەستدان، برینداربوون یان وێرانکاری تۆمار نەکراوە، بەڵام ئەگەری هەیە هەندێک باڵەخانە زیانی كه‌میان بەرکەوتبێت". 
لە سووریاش، دانیشتووانی پارێزگای ڕەققە، سەرێکانی و گوندەوارەکانی باکووری حەلەب هەستیان بە بومەلەرزەکە کردووە، ئەمەش وای لە خەڵک کردووە ماڵ و شوێنە بازرگانییەکانیان جێبهێڵن. تورکی خەلیل، یەکێک لە دانیشتووانی شارۆچکەی سلووک لە گوندەوارەکانی باکووری ڕەققە، ڕایگەیاند بەهۆی ترس لە ڕوودانی پاشەلەرزەی دیکە، هەموو ئەوانەی لەناو ماڵ و دوکانەکاندا بوون چوونەتە دەرەوە. 
خەلیل ئاماژەی بەوەش کرد کە خەڵکی باکووری سووریا یادەوەرییەکی تاڵیان لەگەڵ بومەلەرزەکەی شوباتی ٢٠٢٣دا هەیە کە بووە هۆی کوژران و برینداربوونی هەزاران کەس و وێرانکارییەکی زۆر. جەختیشی لەوە کردەوە کە چەقی ئەم بومەلەرزەیەش دەکەوێتە باکووری شارۆچکەی سلووک لە دیوی تورکیا، کە هەمان ئەو ناوچەیەیە پێشتر کارەساتەکەی ساڵی ڕابردووی تێدا ڕووی دا. 
تورکیا دەکەوێتە سەر چەندین هێڵی درزی جیۆلۆجی کە پێشتر کارەساتی وێرانکەریان لێ کەوتووەتەوە. لە شوباتی ساڵی ٢٠٢٣دا، بومەلەرزەیەکی وێرانکەر بووە هۆی گیانلەدەستدانی لایەنی کەم ٥٣ هەزار کەس لە باشووری ڕۆژهەڵاتی تورکیا و نزیکەی ٧ هەزار کەس لە سووریا، هەروەها زیاتر لە ٣٠٠ کەسیش تەنها لە شاری شانلی ئورفا بەو هۆیەوە گیانیان لەدەستدا.