دادگای فەرەنسا دۆسیەی سکاڵاکەی مباپێ دژی پاریس سانجێرمان دادەخات

پەیام سپۆڕت - مەڕوان تاڵیب

دەسەڵاتی دادوەریی فەرەنسا دۆسیەی سکاڵاکەی مباپێ دژی پاریس سانجێرمان دادەخات و کۆتایی بە کێشەکان دێت.

دادگای فەرەنسا بڕیاری کۆتایی لەسەر داخستن و هەڵپەساردنی ئەو سکاڵایە دا کە لەلایەن مباپێ دژی یانەی پێشووی، پاریس سانجێرمان، بە تۆمەتی "فشاری دەروونی و بێزارکردن" تۆمار کرابوو، ئەمەش دوای ئەوەی دادگا بەهۆی نەبوونی بەڵگەی پێویست و کشانەوەی بەرەی مباپێ لە بەدواداچوونی کەیسەکە بڕیاری داخستنی فەرمیی پەڕاوەکەی پەسەند کرد.

ئەم هەنگاوە دوای ئەوە دێت کە پارێزەرانی یاریزانەکە لە کاتی ململانێ داراییەکانی ساڵی ڕابردوودا سکاڵاکەیان پێشکەش کردبوو.

ڕەگی ئەم ململانێیە دەگەڕێتەوە بۆ سەرەتای وەرزی ٢٠٢٣-٢٠٢٤ کاتێک کارگێڕیی یانەی پاریسی بڕیاری دوورخستنەوەی مباپێی لە مەشقەکانی تیپی یەکەم دا دوای ئەوەی ڕەتیکردەوە گرێبەستەکەی نوێ بکاتەوە، کە ئەوکات بە هەوڵێکی یانەکە بۆ ناچارکردنی یاریزانەکە بە نوێکردنەوە یان جێهێشتنی پێشوەختە لەقەڵەمدرا، بەڵام دوای چەند هەفتەیەک ناوبراو گەڕایەوە بۆ پێکهاتەکە و تاوەکو هاوینی ٢٠٢٤ لە پارک دی پرێنس مایەوە و پاشان بە گرێبەستێکی بێبەرامبەر ڕووی لە سانتیاگۆ بێرنابیۆ کرد.

جێگەی ئاماژەیە مباپێ پێشتر سەرکەوتنێکی گەورەی یاسایی لە دژی پاریس سانجێرمان بەدەستهێنابوو کاتێک دادگای کاری فەرەنسی لە مانگی ئایاری ٢٠٢٥ بڕیاری کۆتایی دا بە پابەندکردنی یانە فەرەنسییەکە بە پێدانی بڕی ٦١ ملیۆن یۆرۆ وەک شایستە دارایی و پاداشتە ڕاگیراوەکانی، کە پاریس سانجێرمانیش تانەی لە بڕیارەکە نەدا و پارەکەی خەرج کرد.