عەراقچی: تاران ئامادەیە بۆ گەیشتن بە چارەسەرێکی دادپەروەرانە

وەزیری دەرەوەی ئێران، عەباس عەراقچی ڕایگەیاند وڵاتەکەی ئامادەیە بۆ گەیشتن بە چارەسەرێکی دادپەروەرانە، لەسەر ڕێگای دیپلۆماسی بەردەوام بێت. 
ئاژانسی ھەواڵی فەرمیی ئێران "ئیرنا" بڵاوی کردەوە کە عەباس عەراقچی لە میانی دیداری لەگەڵ باڵیۆزانی بیانی و نوێنەرانی دیپلۆماسی لە تاران ڕایگەیاند: "ئەگەر دوژمن جارێکی دیکە ڕێگای ھێرشی سەربازیی ھەڵبژێرێت ئەوا وەڵامی ئێران لە جاران بەھێزتر دەبێت، بەڵام لەگەڵ ئەوەشدا ئێران ئامادەیە بۆ گەیشتن بە چارەسەرێکی دادپەروەرانە، لەسەر ڕێگای دیپلۆماسی بەردەوام بێت". 
ھەروەھا وەزیری دەرەوەی ئێران باسی لەوەش کردووە، لە پەراوێزی کۆبوونەوەکانی کۆمەڵەی گشتی نەتەوە یەکگرتووەکاندا کە لە کۆتایی مانگی ئەیلوولی ئەمسال لە نیویۆرک بەڕێوەچوو، دانوستانی دۆستانە و ئەرێنیان لەگەڵ وڵاتانی دراوسێ بەتایبەتی وڵاتانی کەنداو ئەنجامداوە. 
بەپێی ئاژانسەکە وەزیری دەرەوەی ئێران، عەباس عەراقچی سەبارەت بەو سزایانەی کە لەلایەن ئەمریکاوە بەسەر ئێراندا سەپێندراون، ڕایگەیاندووە کە واشنتۆن لەسەر ئاستەکانی سەربازیی و دیپلۆماسی، شکستی ھێناوە و وتوویەتی: "بە سەربازیی و سەپاندنی سزای زیاتر کێشەکە چارسەر ناکرێت، بەڵام دەتواندرێت لە ڕێگای دیپلۆماسییەوە، کۆتایی بەو جەنگە ناڕەوایەی دژبە ئێران بھێندرێت".