کریستیانۆ بە مەرج ئامۆژگاری لامین یەماڵ دەکات

پەیام سپۆڕت - بڕیار تەها

کریستیانۆ ڕۆناڵدۆی پۆرتوگالی ئاشکرای دەکات، لە جامی جیهانی یانەکان یاریی بۆ هیچ یانەیەک ناکات و هاوکات بە مەرج ئامادەیە ئامۆژگاری لامین یەماڵ بکات.

 لە کۆنگرەی ڕۆژنامەوانی پێش یارییەکەیان بەرانبەر ئیسپانیا لە یاری کۆتایی نەیشنسلیگ، سەرەتا کریستیانۆ ڕایگەیاند، سەرەڕای ئەوەی گرێبەست و پێشنیاری زۆری بۆ کراوە بەڵام بڕیاریداوە بەشداری جامی جیهانی یانەکان نەکات و پەیوەندی بە هیچ کام لە یانە بەشداربووەکانەوە نەکات.

دواتر پرسیار لە ئەستێرە پۆرتوگالییەکە کرا کە ئامۆژگاری بۆ لامین یەماڵ چییە، لە وەڵامدا دۆن وتی: هەرکەسێک ئامۆژگاری منی بوێت بە شێوەیەکی تایبەت و ڕووبەڕوو ئامۆژگاری دەکەم نەک لەبەردەم خەڵکدا.

لە بەردەوامی قسەکانیدا کریستیانۆ سەربارەت بە یارییەکەیان وتی: ئەم نەوە نوێیەی ئیسپانیا کە دێتە پێشەوە زۆر بەهێزە، تەنانەت ڕاهێنەری هەڵبژاردەی ئیسپانیا کارێکی نایاب دەکات، ئیسپانیا ڕکابەرێکی زۆر بەهێز و سەختە.

لە کۆتایدا لە بارەی خەڵاتی باڵۆندۆرەوە کریستیانۆ دەڵێت: پێم وایە خەڵاتە تاکەکەسییەکان بەشێک لە مانای ڕاستەقینەی خۆیان لەدەستداوە، هیچ پێوەرێکی ڕوون نییە کە بڵێین یاریزانێک شایەنی خەڵاتەکەیە، لە ڕوانگەی منەوە ئەو یاریزانەی چامپیۆنسلیگ دەباتەوە لە بردنەوەی باڵۆندۆر نزیکترە.