سلۆت کێشەی وەرزی ڕابردووی تیپەکەی ئاشکرا کرد

پەیام سپۆڕت - مەڕوان تاڵیب

ئاڕنی سلۆتی ڕاهێنەری یانەی لیڤەرپووڵ کێشەی وەرزی ڕابردووی تیپەکەی باس دەکات و ڕووبەڕوبونەوەی گەلەتەسەرای بە قورس ناو دەبات.

 لە کۆنگرەی ڕۆژنامەوانی بەر لە یارییەکەیان بەرانبەر یانە تورکییەکە لە چامپیۆنسلیگ، سلۆت ئاماژەی بەوەدا، ئەوان تیپێکی جیاوازن و بردنەوە لێیان قورسە، بە تایبەتی کە حەوت یاریی سەرەتایی خولەکەیان بردووەتەوە، بۆیە لەڕووی دەروونییەوە بەهێزن، بەڵام نابێت لیڤەرپووڵ و گەلەتەسەرای بەراوردی یەکدی بکرێن، چونکە لەڕووی پێکهاتەوە زۆر جیاوازی هەیە.

لە بەشێکی دیکەی قسەکانی ڕاهێنەرەکەی ڕێدز ڕایگەیاند، یاریی دەکەن بۆ بردنەوە و تۆمارکردنی گۆڵ، نەک تەنیا بیر لە پاراستی گۆڵەکەیان بکەنەوە، پێویستە لە تیپەکانی دیکە زیاتر کۆنتڕۆڵی تۆپ بکەن، یەکێک لە خاڵە بەهێزەکانیان لە وەرزی پێشوو دوورخستنەوەی تیپەکان بوو لە گۆڵەکەیان، ئەمەش تەنیا کاری بەرگری نەبووە، بەڵکو پلانەکە لە شوێنی دیکەوە جێبەجێ کراوە.

سلۆت کێشەی وەرزی ڕابردووی لیڤەرپووڵی بۆ تۆپە وەستاوەکان گەڕاندەوە و وتی: چوار گۆڵمان لە تۆپە جێگیرەکانەوە لێکرا و بۆیە بەرگریکاری باڵەکانمان گۆڕی، هاوکات زۆر بە دەگمەن گۆڵمان لە تۆپەوە وەستاوەکانیشەوە تۆمار دەکرد، بۆیە بە دڵنیاییەوە پێویستە لەو ڕووەوە زیاتر بەرەو پێشەوە بچین.