18/07/2025
251 جار خوێنراوەتەوە
سووریا.. ڕووبەڕووبوونەوەی توندی نێوان هۆزە عەرەبیەكان و دروزییەكان بەردەوامە
پەیام
هۆزە عەرەبییەكانی سووریا ڕاپەڕینی گشتییان دژ بە ژمارەیەك لە گرووپە دروزییەكان ڕاگەیاند و بەڵێنیان دا سەرجەم پارێزگاكان بۆ ژێر ڕكێفی دەسەڵاتی ناوەندی بگێڕنەوە.
دوێنێ، پێنجشەممە، هۆزە عەرەبییەكانی سووریا بۆ بەهاناوەچوونی هۆزە كۆچەرییەكان بەهۆی هێرش و پەلاماری ژمارەیەك گرووپی دروزەكانەوە لە پارێزگای باشوور ڕاپەڕینی گشتییان ڕاگەیاند.
هاوكات وەك خۆیان دەڵێن "لەپێناو فریاكەوتنی كۆچەرییەكان و ڕزگاركردنیان لە كۆمەڵكوژی بە دەستی دورزییەكانی سەر بە حیكمەت هیجری"، لە شەوی ڕابردووەوە ڕووبەڕووبوونەوەی توندی نێوان هۆزەكان و چەكدارانی دروز لە سوەیدا بەردەوامە و هۆزكان توانیویانە دەست بەسەر ژمارەیەك گوند و شارۆچكە و فڕۆكەخانەیەكی سەربازییدا بگرنەوە و درۆنی زایۆنیش بۆردومانی هۆزە عەرەبییەكان دەكات.
لە چەند ڕۆژی ڕابردوودا و لە ئاكامی هێرش و پەلاماری گرووپەكانی سەر بە حیكمەت هیجری سەرۆك و ڕابەری ڕۆحی دروزەكانی سوریا 100 كەس لە كۆچەرییەكان كوژراون و دەیان هەزار كەسیش لە گوند و ناوچەكانیان ئاوارە بوون و ماڵەكانیان سووتێنراوە.
بەپێی زانیارییەكان 41 هۆز و خێڵی عەرەبی لە شەڕی ڕووبەڕووبوونەوەی ژمارەیەك لە گرووپە دروزییەكان بەشداری دەكەن و لەئێستادا چوونەتە نێو شاری سوەیداوە.
لە تۆڕە کۆمەڵایەتیەکان شەیری بکە