چەند مەرجێکی سەیر لە گرێبەستەکەی شتیگن بۆ یانەی جیرۆنا جێگیر کراوە

پەیام سپۆڕت - مەڕوان تاڵیب

مارک ئاندریا تێر شتیگنی ئەڵمانی هەر لە کەتەلۆنیا دەمێنێتەوە، بەڵام ڕیزەکانی یانەی بەرشەلۆنەی بەجێهێشت.

 بە شێوەیەکی فەڕمی یانەی جیرۆنا لە پێگەی تایبەتی خۆیان هاتنی گۆڵپارێزەکەی بەرشەلۆنەیان بە خواستن و تاکو کۆتایی ئەم وەرزە ئاشکرا کرد.

بەپێی زانیاریی ڕۆژنامەکان بێت، چەند مەرجێک لە گرێبەستەکە جێگیر کراوە، لەوانە ئەگەر جیرۆنا بیەوێت شتیگن لە بەرانبەر بەرشەلۆنە یاری پێ بکات، دەبێت بڕی 300 هەزار یۆرۆ وەک سزا بدات، هاوکات بەرشەلۆنە داوای کردووە کە جیرۆنا بەشێکی زۆری مووچە بەرزەکەی شتیگن بگرێتە ئەستۆ، ئەمە یارمەتی بەرشە دەدات کە کۆی مووچەی تیپەکە کەم بکاتەوە و بتوانێت یاریزانی نوێ تۆمار بکات، چونکە شتیگن یەکێکە لەو یاریزانانەی بەرزترین مووچەیان هەبوو.

خاڵێکی دیکە ئەوەیە بەرشەلۆنە داوای کردووە کە جیرۆنا ئاسانکارییان بۆ بکات لە گواستنەوەی هەندێک لەو یاریزانانەی کە بەرشە چاوی لێیانە (بۆ نموونە یاریزانی وەک میگێل گوتێرێز یان هەندێک لە بەهرەمەندە لاوەکان)، یان لانی کەم بەرشەلۆنە مافی هەبێت لە کڕینیان ئەگەر یانەیەکی دیکە داوای کردن.

دواتر شتیگن لە پەیامێکی ماڵئاوایی وتی: بۆ ماوەی نزیکەی 12 ساڵ بەرشەلۆنە ماڵی من بووە و شوێنێک کە تێیدا وەک یاریزان و وەک مرۆڤ گەشەم کرد و ساتگەلێکی لەبیرنەکراوم تێدا بەسەر برد، هەست بە سوپاسگوزارییەکی زۆر دەکەم.

لە کۆتایدا گۆڵپارێزەکە وتیشی: شانازییەکی گەورەم پێ بڕا کە شارەی کاپتنی بپۆشم، ئێستا ڕێگاکەم هەر لە کەتەلۆنیا بەردەوام دەبێت و هیوای باشترینتان بۆ دەخوازم بۆ ئەوەی لە وەرزەکە ماوە و هیوادارم ببینم نازناوی زیاتر بەرز دەکەنەوە.