خلێفی پەیامێکی ڕوون بۆ دێمبڵی دەنێرێت

پەیام سپۆرت - بڕیار تەها

ناسڕ خلێفی سەرۆکی یانەی پاریس سانجێرمانی فەرەنسی ڕایگەیاند، لە یانەکەیان سنوورێک بۆ مووچەی یاریزانەکان هەیە و ئەمەش وەک پەیامێک بوو بۆ عوسمان دێمبڵی هێرشبەری یانەکەی.

 لە ماوەی ڕابردوو میدیاکان ئاشکرایان کرد، بەرپرسانی پاریس سانجێرمان لەگەڵ بریکارەکەی دێمبڵی گفتوگۆی سەرەتاییان بۆ نوێکردنەوەی گرێبەستی نێوانیان دەست پێکردووە.

سەبارەت بەوە خلێفی بۆ میدیاکان دواو و وتی: لە پاریس سان جێرمان (سنوورێک) بۆ مووچە هەیە، هەمووان ئەوە دەیزان و دەبێت هەمووان ڕێزی لێ بگرن.

لە بەردەوامی قسەکانیدا سەرۆکی یانە پاریسییەکە جەختی لەوە کردەوە، هیچ کەسێک لەسەروو یانەکەوە نییە و هەمووان دەبێت پابەندی یاساکانی یانەکە بن.

لە کۆتای قسەکانیشیدا ناسڕ خلێفی وتی: عوسمان دێمبڵی ئێستا ئەفسانەیەکی یانەکەیە، من خۆشمدەوێت، هەم وەک یاریزان و هەم وەک مرۆڤ.