ئامێرێكی سیخوڕیی چینی لەناو ئۆتۆمبێلی سەرۆكوەزیرانی بەریتانیا دوای چوار ساڵ دۆزرایەوە

پەیام

دۆزینەوەی ئامێرێكی سیخوڕیی چین لەنێو ئۆتۆمبێلێكی سەرۆكوەزیرانی بەریتانیا كە بۆ ماوەی چوار ساڵ لەكاردا بووە، هەڵایەكی گەورەی دروست كرد، چینیش لای خۆیەوە ڕەتی دەكاتەوە.

ڕۆژنامەی "دەیڵی مەیل"ی بەریتانی ئاشكرای كرد "دەزگای هەواڵگریی بەریتانیا ئامێرێكی شوێنپێهەڵگری چینیی لەنێو یەكێك لە ئۆتۆمبێلە حكومییەكانی سەرۆكوەزیراندا دۆزیوەتەوە". 

ئەم ئامێرە لەنێو پارچەیەكی تەكنیكیی هاوردەكراودا شاردرابووەوە و بۆ ماوەی چوار ساڵ بەبێ ئەوەی هەستی پێ بكرێت، لەنێو ئۆتۆمبێلەكەدا ماوەتەوە. 

دۆزینەوەكە دوای ئەوە هات كە دەزگا ئەمنییەكان دەستیان كرد بە پشكنین و هەڵوەشاندنەوەی وردی ئۆتۆمبێلە حكومی و دیپلۆماسییەكان بۆ ڕووبەڕووبوونەوەی هەڕەشەكانی سیخوڕی بیانی.

بەگوێرەی سەرچاوە هەواڵگرییەكان، ئامێرەكە لەنێو "یەكەی كۆنتڕۆڵی ئەلیكترۆنی"دا لەلایەن دابینكەرێكی چینییەوە چێنراوە و كۆمپانیای بەرهەمهێنەری ئۆتۆمبێلەكەش لە بوونی ئەو پارچە سیخوڕییە  بێئاگا بووە. 

پسپۆڕانی ئەمنی دەڵێن: ئەمە ئاماژەیە بۆ دزەكردنێكی مەترسیدارو تەنیا مەبەست لێی كەسی سەرۆك وەزیران نەبووە. 

ئەم ڕووداوەش گوشاری سیاسی زۆری خستووەتە سەر حكومەتی بەریتانیا تا هەڵوێستێكی توندتر بەرانبەر پەكین بگرێتە بەر.

لە بەرانبەردا، باڵیۆزخانەی چین لە لەندەن بە توندی هەموو تۆمەتەكانی ڕەت كردەوە و بە "دەنگۆ" و "پڕوپاگەندەی بێ بنەما" وەسفی كردن كە ئامانج لێی بەسیاسییكردنی هاوكارییە بازرگانی و ئابوورییەكانە لێدانیشە لە ناوبانگی كۆمپانیاكانی چین.