مۆرینیۆ لە پێناو ڕیاڵ مەدرید ڕاهێنەرایەتی هەڵبژاردەیەکی ڕەتکردووەتەوە

پەیام سپۆڕت - مەڕوان تاڵیب

جۆزێ مۆرینیۆ لە پێناو گەڕانەوە بۆ ڕیاڵ مەدرید ڕاهێنەرایەتی هەڵبژاردەیەکی گەورەی ڕەت کردووەتەوە.
ڕۆژنامەی بەناوبانگی "ئاس"ـی ئاشکرای کرد مۆرینیۆ لە مانگەکانی ڕابردوودا گرێبەستی وەرگرتنی ئەرکی ڕاهێنەرایەتیی هەڵبژاردەی پۆرتوگالی ڕەتکردووەتەوە، تەنۆا لە پێناو گەڕانەوە بۆ یانەی ڕیاڵ مەدرید.

بەپێی زانیارییەکانی ڕۆژنامەکە، پەیوەندییە نهێنییەکانی نێوان فلۆرێنتینۆ پێرێز و "سپێشەڵ وەن" لە مانگی نیسانی ڕابردووەوە دەستیپێکردبوو کاتێک سەرۆکی یانەی شاهانە خۆی ڕاستەوخۆ پەیوەندیی پێوە کرد؛ مۆرینیۆش بەبێ هیچ دوودڵییەک ڕەزامەندیی لەسەر گەڕانەوە بۆ مێرێنگی دەربڕی و چەندین گرێبەستی گەورەی پشتگوێ خست کە لە پێشەنگیاندا هەڵبژاردەی نیشتمانیی وڵاتەکەی بوو.

ڕۆژنامەی ئاس ڕوونیکردەوە کە بەرپرسانی تۆپی پێی پۆرتوگال بە تەواوی لە هەڵوێست و خواستە گەورەکەی مۆرینیۆ تێگەیشتوون بۆ گەڕانەوە بۆ سانتیاگۆ بێرنابیۆ و هیچ نیگەرانییەکیان بەرانبەری نەبووە.