ئیدارەی ترەمپ بازنەی قەدەغەی گەشتكردن بۆ ئەمریكا بۆ زیاترلە 30 وڵات فراوان دەكات

پەیام 

لە چوارچێوەی سیاسەتی توندی كۆچبەراندا ئیدارەی ترەمپ كار لەسەر فراوانكردنی قەدەغەی گەشت بۆ ئەمریكا بۆ زیاتر لە 30 وڵات دەكات. 

كریستی نۆیم وەزیری ئاسایشی ناوخۆی ئەمەریكا ڕایگەیاند، لە چوارچێوەی سیاسەتی توندی كۆچبەراندا، كە ئیدارەكەی دۆناڵد ترەمپ پەیڕەوی دەكات، كار لەسەر فراوانكردنی لیستی ئەو وڵاتانە دەكرێت، كە بڕیاری قەدەغەی گەشتكردن بۆ ئەمریكا دەیانگرێتەوە، بەجۆرێك ژمارەیان لە 19 وڵاتەوە بۆ زیاتر لە 30 وڵات بەرز دەبێتەوە.

نۆیم لە چاوپێكەوتنێكی ڕۆژنامەوانیدا ڕایگەیاند: ژمارەكە بە وردی دیاری ناكەم، بەڵام لە 30 وڵات زیاترە و ترەمپیش بەردەوامە لە هەڵسەنگاندنی وڵاتەكان.

ڕاگەیاندنەكەی وەزیری ئاسایشی ناوخۆی ئەمریكا دوای دوو ڕۆژ لە بڕیاری ئیدارەكە بۆ ڕاگرتنی داواكارییەكانی كۆچ دێت، كە مانەوەی هەمیشەیی و ڕەگەزنامە بۆ هاوڵاتیانی 19 وڵاتە، كە لەنێویاندا (ئەفغانستان، یەمەن، هایتی، ڤەنزوێلا، سوودان و سۆماڵ) هەن.

لەم چوارچێوەیەدا و لە ڕێكارێكی پەیوەندیداردا، ئیدارەكە ماوەی كارپێكردنی مۆڵەتەكانی كاری بۆ پەنابەران، پەناخوازان و توێژەكانی دیكە، لە پێنج ساڵەوە بۆ تەنها 18 مانگ كەمكردەوە، ئەمەش وەك بەشێك لە زنجیرەیەك هەنگاو كە ئامانجیان توندكردنەوەی چاودێرییە بەسەر دۆسیەی كۆچ و چوونە ناو ویلایەتە یەكگرتووەكانەوە.