سێ قسەی حەق، بۆ هەندێ کەسی ناحەق

لە دوای حەوتی ئۆکتۆبەر و داستانی "تۆفانی ئەقسا"وە هەندێ مەلا دەبینین کە هێندەی جولەکەیەکی زایۆنی، دژایەتی خەڵکی مەزڵومی غەززە و موجاهیدانی حەماس دەکەن .
ئەم جۆرە کەسانە  زۆر بێ شەرمانە میبەری پێغەمبەریش بۆ خزمەتکردنی سیاسەت و ئەجێندای هەندێ وڵات بەکاردەهێنن، کە دەیانویست بە فەرمی دان بە قەوارە داگیرکەرەکەی زایۆنییەکاندا بنێن و بۆ هەمیشە کۆتایی بە کێشەی فەلەستین و قودس بهێنن، بەڵام حەماس و خەباتکارانی غەززە، ریسەکەی لێکردنەوە بە خوری.
ئاراستەکراویی ئەمانە، بەجۆرێکە کە کاریان گەیشتووە بە پەلاماردانی مێژوی هێزە ئیسلامییەکانی کوردستان و ئێمەمانان بەوە تۆمەتباربکەن، کە کۆمەڵگەمان دابەشکردووە بۆسەر کوفر و ئیمان و شەڕی هێزە دەسەڵاتدارەکانمان لەسەر ئەو دابەشکارییە کردووە، کە  ئەمە درۆیەکی شاخدارە، عەیبەیە بۆ کەسێک خۆی بە مسوڵمان بزانێت، لەو ئاستە نزمەدا قسە لەسەر مسوڵمان بکات.
بەندە هەم سەرکردە و هەم فەرماندەیەکی سەربازیی بووم لە بزوتنەوەی ئیسلامیی پێشوو، هیچ کات نەمانوتووە ئەو شەڕانەی کردومانە شەڕی کوفر و ئیمان بووە، بەڵکو ئەوکات و ئێستاش وتومانە و دەیڵێین "شەڕی زاڵم و مەزڵوم بووە"
چی مسوڵمانێک قبوڵی زوڵم و دەستدرێژی دەکات و بەرگریی لە خۆی نەکات ؟!
أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا ۚ وَإِنَّ اللَّهَ عَلَىٰ نَصْرِهِمْ لَقَدِيرٌ
سورەتی الحج ئایەتی (39)
سەبارەت بە دۆخی کارەساتباری غەزە و ئەو غەزوەیەی ئێستا لەو خاکە بەرتەسکەی مسوڵمانان بەڕێوەدەچێت، هەر ڕەوت و ڕێکخراو و هێزێکی ئیسلامیی لە خولگەی پوچگەرایی "وەلی ئەمرییەکان"دا نەخولێتەوە، ئەمانە دەکەونە دژایەتیکردن تا ئاستی تۆمەتبارکردن و دژایەتیی و درۆهەڵبەستن بۆیان.

چ کارەساتێکی عەقیدەیی گەورەیە، خوای گەورە لە قورئاندا بەشێک لە جولەکەی بە ترسنۆک و ناخپیس و ڕقاوی و ناپاک وەسفکردبێت، بەڵام کەسانێک لەسەر مینبەری پێغەمبەرەوە بە جولەکە بڵێ "شێر" و بە مسوڵمانان و موجاهیدان بڵێ "درۆزن و ترسنۆک"
شەڕی نێوان فەلەستین و قەوارە داگیرکەرەکەی زایۆنییەکان ٧٥ ساڵە بەردەوامە، لە ساڵی ١٩٤٨ دەستیپێکردووە و بۆیەک ڕۆژیش نەوەستاوە.

٧٥ ساڵە ئەم ڕژێمە تیرۆریستە بەردەوامە لە داگیرکردنی خاکی فەلەستین و دەرکردنیان و دەستگیرکردنیان، کوشتن و هەتک کردن و دەستگیرکردنی ژن و مناڵ و پیروپەککەوتەشیان.

چی ئینسانێک خەباتکارانی قەسام بە تاوانباری ئەم دۆخەی ئێستا دەزانێت و پێیوابێ دەستپێشخەری شەڕی کردووە، مەگەر خوای گەورە پەردەی دابێت بەسەر چاویدا و سەری لێشێواندبێت و ڕاستییەکانی لێ ون کردبێت، خوا پەنامان بدات؟!
خۆزگە ئەم جۆرە بەناو مەلا و بانگخوازانە، هێندەی ژنێکی ئەمریکی و ئەوروپی کە باوەڕی بە ئیسلامیش نیە، ویژدانیان هەبوایە و بەو قسە و هەڵوێستە هەڵە و ناپەسەندانەی لەبارەی غەزوەی غەزەوە دەریانبڕی، خۆیان نەخستایەتە زاویەی زایۆنیزم و بەرەی دژی موجاهیدان و مەزڵومانی خاک و ماڵ داگیرکراوی غەزە .