ئەو رۆژەی عەلی باپیر تەنیا مایەوە

٢٢ ساڵ لە مەوبەر، ڕۆژی ١٠-٧-٢٠٠٣ سوپای ئەمەریكا مامۆستا (عەلی باپیر)یان دەستگیر كرد، ماوەیەك پێش ئەو دەستگیركردنە، هەندێك نووسەرو ڕۆشنبیری كورد سەردانیان كردوو نان و نمەكیان كرد، دوای گرتنەكەی كەس نەبوو وتارێكی خێری لە سەر بنووسێت.

عەلی باپیر لەساڵانی هەشتاوە بڕیاری بە گژاچوونەوەی بەعسی دابوو، بۆ ئەوەش سەنگەری ئیسلامیی هەڵبژاردبوو، من با لە تەك زۆربەی نووسین و بیر و بۆ چونەكانیشیدا نەبم، بەڵام ناكرێت وەك مرۆڤێك وەك كوردێك كاتێك كە سوپای ئەمەریكا دەستگیری دەكەن نقەم لێوە نەیەت.

 ڕاستی من بۆ خۆم ڕام لە سەر ئەمەریكاو سوپاكەی نەگۆڕە، لەوەدا كە ئەمەریكا وەك دەوڵەت و وەك حكومەتیش هەموو دۆستایەتی و شتێك دەكاتە قوربانیی بەرژەوەندی و بەرژەوەندی لە گەڵ شەیتانا بێت لە نێوان مەسیح و شەیتانا، دووەم هەڵدەبژێرێت، سوپاكەشی كە بە شەڕ دەچنە هەر شوێنێك، زۆر نامرۆڤانەو نا ئاكاریانە مامەڵە لە گەڵ خەڵكی ئەو شوێنە دەكەن، دواتریش بۆ ئەوەی بڵێن ئەمەریكا چەند دیموكراتییە، رەنگە سزای چەند سەربازێك بدەن و یەك دوو وتاری ڕەخنە ئامێزیش لە سەر مامەڵەی سوپا لەو شوێنە بنووسن، وەك ئەوەی لە ڤێتنام و ئەڵمانیاو وڵاتانی ئەمەریكای لاتین و عێراق و شوێنگەلی دیكە، ئەوەیان كردووە.

ئەو كاتە وەك هەڵوێستێكی ئاكاری، وتارێكم لە سەر ئەو ناهەقییە نووسی كە بەرانبەر مامۆستا عەلی باپیر كرابوو، بیرمە یەك لە دۆستان پێیوتم تۆ چیت داوە لەوەی لە سەر عەلی باپیر شەڕی ئەمەریكا دەكەیت، وەك ئەوەی ئەمەریكا ئیش و كاریان ئەوە بێت بزانن كێ‌ داكۆكی لە عەلی باپیر دەكات، جا خۆ تۆماس فریدمان لە ناو جەرگەی ئەمەریكا هەمیشە ڕەخنە لەو وڵاتە دەگرێت، ئەمە بۆ نائوم چۆمسكیش وەسابوو، زۆری دیكەش هەن، نە ئەمەریكاو نە سوپاكەی نە فریاد ڕەسن نە فریشتە، بڕۆن بیرەوەری خۆیان بخوێننەوە، لە عێراق ژن و منداڵیشیان دەكوشت و دەیانگوت نەمانزانی.

 لە كەركوك كاتی خۆی منداڵێكیان كوشت، ئێمە لە ڕۆژنامە كردمانە هەڵاو لە لاپەڕەی یەكەم داماننا، دواتر چووبوون بۆ ماڵەكە تا " سوڵح"یان لە گەڵ بكەن، لێرەو لەوێش بە شێوازی خۆیان گیرو گازی ئێمەیان دابوو، گەرچی هەر ئەوان ڕێزنامەیەكیان بە واژوی زاڵمای خەلیل زادەوە بۆ ناردبووین بەوەی ئێمە پەرە بە دیموكراتییەت دەدەین.

ئێستا دوای بیست و دوو ساڵ لەو دیرۆكە، جێی خۆیەتی بپرسین داخوا سوپای ئەمەریكا لەو ڕۆژگارەدا چەندین كەسی بێتاوانیان گرتووەو چۆن مامەڵەیان لە گەڵ كردوون، ئایە سەگیان تێبەرداون یان نا، ئاخر ئەمەریكا سەگ و سەربازی بە یەكەوە بەر دەدایە زیندانی و ئەوانەی ئەو دەستگیری كردون، دوور نییە ڕۆژێك مەزڵوم عەبدی بگرن و بڵێن: لە شەڕی نۆرمادی دا هاوكارمان نەبوو، وەك چۆن كاتی خۆی ڕۆڵی گەورەیان هەبوو لەوەی ئاپۆ دەسگیر بكەن و نەهێڵن هیچ وڵاتێك بیگرێتە خۆی و ڕادەستی توركیا كرایەوە، هەموو چیرۆكی گرتنەكە ئەمەریكا سەرپەرشتی دەكرد، چونكە باوكی ناتۆیە ، بەڵام ئەوەی بینرا، شتی دیكە بوو.