محه‌ممه‌د حه‌كیم
23/05/2023
242 جار خوێنراوەتەوە
ھەرێم بە کێڵگە تێگەشتون؟
دوو لایەنی دەسەڵاتی ھەرێمی کوردستان، وەكو کێڵگەیەکی
کشتوکاڵی مامەڵە لەگەڵ هەرێم دەکەن، ھەر کات تەباو بێگرفت بن، بەروبومەکەی پێکەوە
دەدورنەوە و دەیخۆن وھەرکاتیش ناکۆك بوون، کێڵگەکە دەسوتێنن، بەبێئەوەی هیچ حسابێك
بۆ هاوڵاتیان و لایەنەکانی تر بکەن.
ئەم دەسەڵاتە چاوەڕوانیان لە هێزەکان، وەکو چاوەڕوانیانە
لە نوێنەری پێکھاتەکان وھەندێك وردە دوکانی حیزبیە، هەرچیانوت و هەرچیانکرد
بەدویان کەون، کەی ویستیان پەڕلەمان درێژدەکەنەوە وپاشان شەش مانگ لە حکومەت جیا دەبنەوە
ودواتر بە نێوەڕۆخوانێک ئاشت دەبنەوە، دواتر شەڕەکە دەبەنە پەڕلەمان و لەوێ
هەمووشت تێکدەدەنەوە.
گرفتەکە لەوەدایە: ئەم یارییە ناشرینەی ئەمڕۆی پەڕلەمان،
بە نیشتیمانپەروەری پێمان دەفرۆشنەوە و زۆر ئاسان پێماندەڵێن: ئێمە لە خەمی پرسی
دیموکراسیەت و و دەستاودەستکردنی دەسەڵاتین، هەربۆیە کۆمسیۆنمان کاراکردەوە، ئەوی دیکەشیان
دەڵێت: بۆیە دژی وەستاینەوە، لە کاتێکدا هەموان باش دەزانین ھیچ لایەکتان باوەڕتان
بە دەستاودەستکردنی دەسەڵات نییە، تا چەک و پارەتان هەبێت، خۆتان بە خاوەنی کێڵگەکە
دەزانن، لە خواردنی بەروبومەکەیەوە تا سوتاندنی.
لە راستیشدا بۆ نوێنەری پێکھاتەکان، ئەمڕۆ باشترین بەڵگەبوو
کە سەربەخۆ نین و نوێنەرایەتی راستەقینەی پێکهاتەکان ناکەن و، پێداگیریتان لەسەر
مانەوەی شێوازی هەڵبژاردن وەک رابردوو، بەردەوامی ومانەوەتانە لەسەر ئەم سیاسەتە،
کە قازانجەکەی بۆ چەند کەسێکە و پێکھاتەکان لێی مەحرومن.
لە ئێستاشدا دۆخی ھەرێم ناڕوونە و ونازانم ھێزەکانی تر
چیان پێدەکرێت لەم نێوەندەدا، چونکە ئەوانیش خاوەن دیدگاو بەرنامەی ھاوبەش نین و بگرە
لە یەکتریش لە سەنگەرن و هەموو ناتەباییەکی هێزەکانی دەرەوەی دەسەڵاتیش، خزمەت
بەمانەوەی ئەم دۆخە ناڕوونە دەکات.
لە تۆڕە کۆمەڵایەتیەکان شەیری بکە
هەموو وتارەکانی محه‌ممه‌د حه‌كیم